Үйл Явдал

Төрийн ордны хойд талд буй цэцэрлэгт хүрээлэнгийн газар дээр парламентын ордон барихаар эрх баригчид шийдвэрлэснийг Иргэний Зориг нам эрс буруушааж байна.

Төрийн ордны ард орших цэцэрлэг нь Нийслэлд үлдсэн бараг цорын ганц гэж хэлж болох ногоон байгууламж бөгөөд хотын хүн амын төвлөрөл өсч, агаарын бохирдол гамшгийн хэмжээнд хүрсэн энэ үед түүнийг  устгах нь харалган бөгөөд цөөн хэсэг албан тушаалтны эрх ямбын төлөө олон нийтийн эрх ашгаас урвасан үйлдэл болох юм.

Дээрхийн адил ногоон байгууламжийг дахин байгуулахын тулд наад зах нь 50-70 жил хэрэгтэй гэдэг нь хэнд ч илэрхий ойлгомжтой билээ.

Иймд Иргэний Зориг нам цэцэрлэгт хүрээлэнг өөрийн хамгаалалтанд авч байгаагаа үүгээр мэдэгдэж, олон түмний эрх ашигт үл нийцэх шийдвэрээсээ нэн даруй татгалзахыг эрх баригчдаас шаардаж байна. 

                                    ИРГЭНИЙ ЗОРИГ НАМ

УИХ-ын Төрийн байгуулалтын байнгын хорооны 2008 оны арваннэгдүгээр сарын 27-ны өдрийн хуралдаанаар “Төрийн ордон” цогцолборыг Төрийн тусгай албан хаагчдын нэгдсэн эмнэлгийг нүүлгэж суурин дээр нь барих тухай өмнөх шийдвэрээсээ татгалзаж Төрийн ордны хойд талын цэцэрлэгт хүрээлэнгийн газар дээр барихаар болсныг хүлээн зөвшөөрөх боломжгүй, оновчтой бус шийдэл гэж үзэж буйгаа өнөөгийн байдлаар 24 гишүүн илэрхийлж санал нэгдээд байгаа аж.

Тэдгээр гишүүд Төрийн байгуулалтын байнгын хорооны хуралдаанаар уг асуудлыг дахин хэлэлцэж Улаанбаатар хот дахь хүн амын төвлөрөл, агаарын бохирдол, дуу чимээ, тоосжилтын төвшин зэрэгтэй харьцуулахад хэт цөөдөж буй цэцэрлэгт хүрээлэнгүүдийн нэгийг хадгалж үлдээх шийдвэр гаргах нь зүйтэй гэж үзсэнээ байнгын хорооны даргад илэрхийлж албан бичиг илгээгээд байна.

Уг саналд УИХ-ын гишүүн С.Оюун, Г.Баярсайхан, Д.Энхбат, Ц.Шинэбаяр, Д.Загджав, Ж.Батсуурь, З.Алтай, Д.Батбаяр, Я.Батсуурь, Д.Ганхуяг, З.Энхболд, П.Алтангэрэл, Д.Оюунхорол, С.Бямбацогт, Х.Тэмүүжин, Ц.Мөнх-Оргил, Л.Гантөмөр, С.Эрдэнэ, Р.Амаржаргал, Н.Батбаяр, О.Чулуунбат, Х.Наранхүү, Б.Батбаяр нар нэгдэж гарын үсэг зуржээ.

 Д.ОЮУН

Монголбанкны тэргүүн дэд ерөнхийлөгчөөр Б.Жавхланг томилохыг С.Оюун, З.Алтай, Д.Энхбат нараас бусад нь дэмжснээр  93.9 хувийн, дэд ерөнхийлөгчөөр Н.Золжаргалыг С.Оюун, З.Алтай, Д.Энхбат нарын 6 гишүүнээс бусад нь дэмжиж  87.2 хувийн саналаар томиллоо. Үүний дараа Монголбанкны гурав бие биедээ баяр хүргэж, босоод явахыг завдав. УИХ-ын дарга тэднийг дуудаж, “Тогтоолоо батлаагүй байна. Баярлах болоогүй” гэснээр буцаад суулаа. Тэднийг дээрх албан тушаалд томилсон тухай тогтоолыг баталснаар албан ёсоор Монголбанкны ерөнхийлөгч болсон юм.